15 e 16 de maio: Feira mariñeira "Conserva o galego"

Chegan as Letras e é unha das datas máis destacadas nesta escola.

Levamos xa un tempo descubrindo a Luísa Villalta, a súa vida e a súa escrita cun montón de actividades e mesmo salas de fuga e; ligando a homenaxe a esta escritora co noso proxecto deste curso decidimos crear a nosa Feira Mariñeira "Conserva o galego".

Comezaremos a semana recibindo (se asinamos o compromiso de incremento de uso da lingua) a nosa pulseira "Conserva o galego. Fálao"

O vindeiro 15 e 16 de maio (mércores e xoves) o cole vivirá a súa feira cargada de obradoiros, encontros e tamén actuacións do alumnado. 

É certo que tivemos que  facer varias alternativas pola previsión de chuvia pero agardamos levar todo a porto....

Teremos moitos obradoiros (estampación, pulseiras mariñas, chaveiros de nós...) tamén recursos para as aulas, recunchos coma o do noso maio deste ano e uns encontros que levamos moito tempo agardando con Rogelio Santos Queiruga e coas redeiras do Fieital! 

Ademáis o xoves 16 actuaremos e teremos tamén un convidado (Félix Arias) e o acompañamento de 3 magníficos violinistas (Luca Capobianco Pazos, Artai Lema Lema e Aaron Puga Puente) para axudarnos na gala coa que pecharemos esta feira homenaxe a Luísa Villalta (tamén violinista) e ás ondiñas do noso proxecto e ás conserveiras (de onde cres que viña o lema deste ano se non?!)

Como tamén estudamos a lenda e a festa da Maruxaina (San Cibrao) optamos por inspirarnos nesa celebración por se queredes traer unha vestimenta semellante.

Ah, e lembrade axudar a facer o noso maio deste ano ao que cantarlle un bo maio!

Serán dous días moi intensos pero agardamos que tamén emocionantes e proveitosos para todos e todas! Chega a feira!

Certame literario!

 Co gallo do Día do Libro convocamos unha nova edición do noso Certame Literario!

Pode participar todo o alumnado do CEIP Juana de Vega así que lede ven as bases e a crear!

Lembrade que as oibras deben ser orixinais, en lingua galega e que se valorará a súa relación co proxecto do cole (ondiñas veñen). 

Tedes ATA O 8 DE MAIO PARA PARTICIPAR.

Fin do trimestre, radio e recomendacións.

Seguimos co proxecto Ondiñas Veñen e virando tellas e ademáis de todo o que contamos na entrada anterior non podemos esquecer a obra de teatro que preparou o alumnado de 5º de primaria chamada "O Apalpador e o rito de virar as tellas" agardamos que poidades ter unha versión radiofónica á volta das vacacións pero mentres, desto e de moito máis sobre como foi este primeiro trimestre de proxecto falan os alumnos e alumnas de 6º neste novo episodio do programa "O falar da xente" que podedes escoitar AQUÍ e no que fan un breve resumo do trimestre.

O final de trimestre veu cargado con este rito pero tamén cunha danza de luz na que o alumnado de 4º se convertiu en faros que alumean Punta Atalaia lembrando a lenda da Maruxaina, con panxoliñas e cantos de reis que piden o aguinaldo, con contos na lareira da biblioteca... un sinfín de cousas que rematan este  xoves coas badaladas da escola. 

Despedímonos ata o vindeiro trimestre coas nosas xa célebres suxerencias de lectura e xogos.

Non esquezas seguirnos noutras redes onde temos moito outro material e noutros tempos e...

Ata o ano que ven! 

O inverno, virando tellas.

O proxecto medra e medra en cada aula e recuncho do centro...

Instalacións, debates, investigacións... hai de todo!

E chegado decembro, despois da marexada violeta que vivimos no 25N contra a violecia machista, comezamos a descubrir un rito que se ten recollido por toda a costa galega (e parte de Portugal)

É o rito de virar as tellas que, coma o seu propio nome indica, consiste en virar unha tella pretendendo así que o vento cambie e as persoas que traballan no mar poidan regresar sás e salvas ao fogar e reencontrarse cos seus seres queridos.

Nunha homenaxe a estes reencontros as aulas fixeron diferentes investigacións sobre o rito,  materiais, libros, cancións, poemas... e finalizamos todos e todas con varias cousas. Por unha banda creamos as nosas pequenas tellas decoradas para homenaxear os reencontros destas datas tan sinaladas e por outra decoramos grandes tellas para a nosa a instalación invernal que ocupa o corredor principal do centro.

Como pasamos de non coñecer o rito a ser case uns e unhas expertas foi prácticamente máxico!

O Samaín

 O Samaín chegou, as ondiñas que veñen non paran de medrar nas aulas e entre toda a voráxine atopamos un libro procedente dun naufraxio...

Algo así sucedeu.

Entre todo o cole creamos o noso libro de "Historias á deriva" e nel podemos atopar avistamentos de bestas mariñas e a súa descrición, conxuros e lendas do mar, contos, o diario de a bordo dun barco capitaneado por nenos e nenas, retos matemáticos mariños... un montón de cousas que desfrutar! Bo traballo!

Ademáis a biblio encheuse de historias do noso Samaín, decoracións e, por suposto, todo ligado ao noso proxecto do curso "Ondiñas veñen"

Falamos dos "buques pantasma", de Galicia coma o maior cemiterio de barcos do mundo, do Samaín en Cedeira ou as peregrinacións a San Andrés de Teixido, dos calvaquiños o da viaxe das almas ao alén co barqueiro ou historias da illas atlánticas...

View this post on Instagram

A post shared by Biblionós (@biblionos)

E tivemos un montón de obradoiros na biblio cos que celebrar a data e a apertura da mesma:

Obradoiro de pulseiras de Samaín, de xogos de mesa "de morte", de robótica nunha illa misteriosa, de historias e escritura creativa, de debate e diálogo no faladoiro...

Sen esquecer a exposicións de calzado da bruxa mariñeira...

Podes botar un ollo á instalación no noso instagram!

O comezo do 23-24

 Pensabas que non estabamos por aquí?

O curso comezou cun reto: Descubrir o noso proxecto do curso 2023-2024 e para iso tivemos que ir descifrando pistas que aparecían no corredor principal do centro...

Ao longo dos días apareceron obxectos, textos e mesmo sons cos que intentar descubrilo.

Un título de 12 letras, unha rede, algo sobre unha tipografía chamada Fontoira, nubes de verbas, uns botóns con notas musicais que so daban a pista final se eran pulsados na orde correcta... con estos e outros obxectos descubrimos que o noso proxecto se chamaba:

Ondiñas veñen...

Ondas, mares, océanos, viaxes, lendas, embarcacións, sinais... a cantidade de aprendizaxes e experiencias que agocha este título...

Resolución do Certame Literario

 Co gallo das Letras Galegas déronse a coñecer as obras premiadas no certame literario deste ano.

Recibíronse máis de 80 obras de gran calidade nas distintas categorías e a salección non foi nada sinxela para o xurado así que, de primeiras, noraboa a todos e todas.

Cada participante de infantil e primaria recibiu un pequeno recoñecemento e ademáis os autores e autoras gañadoras recibiron o seu premio durante a nosa celebración da Feira das Letras.

A continuación podedes ver todas obras gañadoras de cada categoría.

Parabéns a todos e todas!