LECTURAS POLA IGUALDADE

O 25 de novembro conmemoramos o "Día Internacional para a eliminación da violencia contra as mulleres". Hai cincuenta e oito anos, na República Dominicana, asesinaron ás irmás Mirabal (Patria, Minerva e María Teresa), por defender os seus dereitos. Desde 1981, e por decisión da ONU, este día dedicámolo a lembrar ás mulleres que sofren violencia polo feito de selo, buscando a igualdade e tentando eliminar prexuízos.

Desde a escola queremos contribuir a crear un espazo máis igual para todos e todas, nos que o noso sexo non sirva como disculpa para poñernos límites. Ofrecemos unha guía de lectura con diversidade de títulos e soportes para que poidamos poñer en palabras o que vivimos cada día. Somos diferentes, pero iguais en dereitos e obrigas. Respectémonos. 

Mochilas viaxeiras

Xa están en circulación as mochilas viaxeiras de Primaria. Todas elas conteñen unha selección de lecturas para compartir en familia. Inclúen, ademais de libros, revistas e películas, un caderno no que cada familia pode reflectir a súa opinión sobre a actividade, o que máis lle gustou ou o que querería mellorar. Desta viaxe todos aprendemos, e o máis importante, disfrutamos compartindo o pracer de ler. 

Feliz aventura!

Guía de usuarios para o curso 2018/2019

O luns, día 26 reabre BIBLIONÓS con moitas novidades. Para ir facéndote unha idea, compartimos a nova guía de usuarios, que resume as características da biblioteca e as orientacións para o seu uso correcto. 

Novembro, Mes da Ciencia en Galego

Como cada ano, dedicamos este mes á Ciencia en Galego nas Bibliotecas Escolares, por iniciativa das Consellerías de Cultura e Educación, xunto coa Secretaría Xeral de Política Lingüística.

É o momento de poñer en valor as publicacións feitas para os distintos niveis de ensino, e difundir os recursos que científicos, escritores e especialistas diversos publican en distintos medios e soportes. 

Neste curso, o Profesor de Bioloxía da Universidade de Vigo, Luis Navarro, publica un manifesto, no que afirma: "Para ser libre mediante a cultura, igual ca para facer boa cienica, hai que ler". 

Aproveitemos as actividades preparadas desde distintas bibliotecas  para disfrutar da ciencia viva, e mellorar o noso coñecemento do mundo no que vivimos, neste mes e durante todo o ano. Non hai mellor viaxe.

 

SAMAÍN

Todos estades agardando pola festa do Samaín, a festa que da entrada ao Outono. Pero, sabíades que é unha festa viaxeira? O equipo de Normalización e Dinamización Lingüística do cole preparou un resumo que o explica e ofrece diversas propostas para que coñezas mellor a festa.

En outras culturas, como a mexicana, o "Día de Muertos" honraban ao espírito dos guerreiros, e a tradición pervive como unha festa popular, chea de cores, danzas, e comidas especiais, como sucede coa nosa tradición.

Podes consultar aquí as lecturas que a biblioteca ofrece sobre o tema do medo. Se fas clic sobre o debuxo, podes acceder ás cancións seleccionadas para a festa de samaín deste ano.

O alumnado de 1º A visita a biblioteca

Antes de abrir oficialmente a biblioteca, todos os alumnos e as alumnas do cole nos visitan. Así, poden recoñecer os espazos e o seu uso, e lembrar as normas fundamentais para que todos e todas poidamos disfrutar durante todo o curso. Os pequenos de 1º A estiveron moi atentos, e por iso puideron facer estes fantásticos debuxos que ilustran todo o que aprenderon.

1º A from Biblionós on Vimeo.

Día da Biblioteca Escolar

Desde 1997, por iniciativa da Asociación Española do libro Infantil e Xuvenil, celebramos o "DIA DA BIBLIOTECA ESCOLAR". 

Para celebralo, cada ano un escritor nos dedica un breve texto, ao que chamamos "pregón", e o escollido en 2018 é Gonzalo Moure, autor de fermosísimos textos que teñen que ver co Sáhara e a intensa vida dos seus habitantes que, a pesares de verse obrigados a vivir no deserto, non perden a esperanza e a ilusión, e loitan por seguir aprendendo e manter a súa cultura. 

Aquí vos deixamos o texto que Gonzalo Moure escribiu.

Somos centro PLAMBE!

Publícase hoxe a resolución provisional de centros seleccionados para entrar no curso 2018/19 no PLAN DE MELLORA DE BIBLIOTECAS ESCOLARES, dentro do Plan LÍA. Para o C.E.I.P. "Juana de Vega", que inciará o seu cuarto curso en funcionamento, será unha estupenda noticia, e o equipo de Biblioteca quere compartila con toda a comunidade escolar, xa que sen a colaboración de TODOS é imposible acceder a este proxecto. Os agradecementos a repartir entre claustro, alumnado e familias facémolos extensivos á ANPA e ao CFR, que desde o comezo colaboraron coa biblioteca con ilusión e entrega. En setembro, vémonos. Feliz verán!

8 de Marzo, dia da Muller Traballadora

O pasado 11 de febreiro celebrouse o "Día da Nena e da Muller na Ciencia", coa finalidade de equilibrar a visibilidade entre os xéneros no mundo científico. Por este motivo, en colaboración co Departamento de Orientación, recopilamos recursos para investigar sobre mulleres científicas. Queda como mostra este "Symbaloo" ao que chamaremos "8 de marzo", e que iremos incrementando con máis enlaces interesantes.  

Cando o amor reborda as paredes

Rematou o mes de febreiro, adicado ao amor e á amizade. Desde o equipo de biblioteca tivemos o atrevemento de pedirlle ás familias que compartisen con nós o seu sentimento de amor polos fillos. O resultado foi espectacular, e queremos agradecelo moi sinceramente. Non caben aquí todas as cartas, e apenas couberon nas paredes da escola, como tampouco cabe o sentimento máis profundo, o que nos emocionou lendo as vosas palabras. Moitas grazas polo vosa colaboración. Reborda. 

Aniversario de Rosalía

A finais de febreiro de 1837 nacía en Compostela unha nena á que puxeron por nome Rosalía. Co tempo, convertiríase na muller que escribiu os poemas que todos os galegos recitamos e cantamos,

mesmo sen saber que son obra de ela. Para celebralo, imos organizar na biblioteca un "Recital de poesía", no que poderemos participar todos e todas, escoitando ou recitando os seus poemas. Para saber máis sobre Rosalía, podes premer aquí, onde atoparás información interesante sobre a súa vida e a súa obra, ou visitar a súa páxina web, onde atoparás imaxes da súa propia casa.