Día do libro 2022: Certame literario!

 Feliz día do libro a todas e todos!! (Ben, case, que xa sabemos que é mañá,  sábado 23)

Temos unha boa nova!:

Para comezar deixámosvos o texto conmemorativo deste ano, que correu ao cargo de Xosé Ballesteros e agardamos que vos guste e vos inspire, nel fala da viaxe que inician autores/as e ilustradores/as, con parada en editoriais, imprentas, librarías, para atopar, finalmente, porto seguro en bibliotecas como a nosa a carón dos lectores e lectoras. 

Ademáis, que ledicia nos deu ler a última das liñas do texto: 

"Velaí o libro: unha faísca da memoria do mundo"

Non podía ser máis acaído para dar a benvida á nosa nova mascota. Faísca!!!

E agora imos coa boa nova que adiantamos...

ESTADES CONVOCADAS/OS!!!

Co gallo do Día do Libro a vosa biblio convoca o segundo certame literario no que podedes dar ás á vosa imaxinación, sabemos que hai grandes lectores/as, escritores/as, ilustradores/as nas aulas así que devecemos por botar un ollo ás vosas obras.

Aquí tedes un resumo da convocatoria e ante calquera dúbida... preguntade!

Mira a túa categoría, non esquezas a data e...participa!

Pd: Non esquezas entrar de cando en cando na web da radio, temos novos capítulos do podcast dos "Diarios do Noso Camiño" e novas entrevistas no programa "O falar da xente" así coma outros programas que están a piques de saír do forno de Radio Cigurat!!

Faísca, a nova mascota

 Non foi sen tempo!

Recibimos tantas propostas de mascota para a nosa renovada biblioteca e tan boas que foi moi complexa a escolla así que o primeiro que queremos e dar o agradecemento polas participacións.

Nunha primeira fase escollimos unhas mascotas finalistas 

E finalmente seleccionamos a mascota que representará á nosa biblioteca alá onde sexa preciso e puxémoslle un nome.  Agardamos que todos/as vos sintades orgullosos e orgullosas da mascota escollida que ademáis de reunir as ideas que moitos/as tivéchedes para a mascota é tamén un elemento moi recoñecible e reproducible e distintos formatos, característica que tamén tivemos en conta.

A mascota é unha FOLLA LECTORA unha folla de carballo capaz de viaxar, axudar, traer novas, voar e mesmo brillar, por iso o seu nome é FAÍSCA.

Unha faísca é unha partícula incandescente que pode vir do lume ou producirse co choque doutros elementos. (Coma a luz que nos dan as vosas fabulosas ideas ao ser compartidas...)

Así que podedes darlle a benvida a FAÍSCA, a mascota de BiblioNós. e tamén a noraboa a UXÍO (2ºB) pola creación da mesma. El tamén recibiu o gran premio por traer a proposta gañadora!

Parabéns a todos e todas!

O falar da xente. Entrevistas en Radio Cigurat

 Boas!

Aquí deixamos ligazón ao primeiro capítulo do programa "O falar da xente" o programa de entrevistas de Radio Cigurat.

Neste primeiro episodio o alumnado de 2ºA , tras moitas investigacións sobre a Finca Tenreiro, entrevistou ao alcalde de Oleiros que tivo a ben contestar e explicar moitas cuestións sobre ese espazo cheo de historia e historias. 

Bota unha orella e anímate a descubrilo!

Podedes acceder desde a nosa web de radio (AQUÍ) , desde o logo de Radio Na Biblio da barra lateral ou mesmo nesta imaxe.

Agardamos que vos guste.

Saúdos!

O noso entroido choqueiro!

Logo chega! Xa case está aquí o entroido!

Que delicia de tempo... cheo de festa, novidades, cores, vestimentas diversas e paparotas e cheo tamén de enerxía e ledicia!

E ti? Xa sabes que son os choqueiros e choqueiras? De calquera xeito seguro que estás moi preto de descubrilo co noso fabuloso Orgullo Choqueiro para o que temos preparadas un montón de de actividades e información. 

Coma adianto quedan aquí os nosos Mandadiños do Meco deste curso, que poderás cumprir de luns a venres da semana previa ao entroido.

Comezaremos coas cores vermella e laranxa o luns 21 de febreiro para rematar coma auténticos choqueiros e choqueiras de todas as cores o venres 25. 

Preparados/as? Aí van os cartaces: 

Como o vedes? Bota un ollo polo teu armario ou mesmo no faiado, rebusca e escolle a túa vestimenta máis divertida para cumprir coas mandas nesta semana chea de leria, que se vexan os/as choqueiros/as!!

Podcasts no aire!

 A radio escolar segue a dar moito que falar!

Sen dúbida é unha das ferramentas estrela da biblio e non queremos deixar pasar a oportunidade de que escoitedes algunhas das novas creacións.

Aquí tedes un novo programa chamado "Diarios do Noso Camiño" no cal o alumnado de 6º vai contado, a través dos seus diarios de viaxe personais, as súas aventuras facendo un máxico Camiño de Santiago.

Os capítulos da historia son as etapas que percorren (e que agardan seguir percorrendo ata chegar a Santiago de Compostela), neles os propios protagonistas dos diarios relatan as súas vivencias cheas de lendas, retos, misterios, música... 

Neste programa atoparás a mistura perfecta entre a realidade (o que fai o alumnado de 6º) e a ficción (a aventura que enmarca toda esas tarefas) contado cun gusto e imaxinación exquisitos polos propios aventureiros e aventureiras.

Eu xa devezo por saber que sucederá na vindeira etapa así que ti non o perdas tampouco e acompaña a esta rapazada na súa aventura!

Lembra que podes acceder sempre á web da radio clicando na icona da dereita (radio na biblio)! 

Suxerencias de lectura. Decembro 2021

 Boas a todos e todas!

Temos os arquivos cheos de propostas para a nova mascota da biblioteca! Moitas grazas a todos e todas por participar!

Agardamos poder resolver o certame durante o mes de xaneiro para inaugurar a tempada! Puxéchedes moi dificil o tema así que grazas, sodes uns e unhas artistas!

Por outra banda chegou decembro e como é xa tradición deixamos aquí as nosas suxerencias de lectura deste ano.

Tedes suxerencias para pre-lectores/as, primeiras lecturas, lectores/as autónomos/as, expertos/as, xogos que nos gustan e tamén recomendacións para adultos/as!

Agardamos que vos guste e que as vacacións cheguen cun montón de lecturas e aventuras.

Coidádevos moito e desfrutade

Bo aninovo!

CERTAME: BÚSCASE NOVA MASCOTA!!

A BiblioNós está traballando arreo na súa "reforma" e a re-apertura está cada vez máis próxima, menudas ganas!!!

Para celebrar este rexurdimento tras meses moi duros para a biblio buscamos NOVA MASCOTA.

Esta NOVA MASCOTA identificará e divulgará as actividades e accións da biblio e para iso... que mellor que a imaxinación de todos e todas vós?

Por iso CONVOCAMOS CERTAME! Anímate e participa no noso certame para atopar a nova mascota e o seu nome. Podes presentar unha obra en calquera formato sempre que sexa antes do 4 de decembro.

Aquí abaixo deixamos toda a información para o concurso, como participar, o que se terá en conta, premios... Preparadxs? ADIANTE!