FEIRAS DO LIBRO

Agora que temos que ir adaptándonos á "nova normalidade", precisamos de recuperar certas rutinas, celebracións que antes pasaban desapercibidas por ser habituais cada vez que se achega o verán. Se aproveitamos a chegada do bo tempo co desconfinamento para pasear polo noso país teremos a fortuna de poder concidir coas Feiras do Libro que se celebran a partir de hoxe mesmo en Compostela. En Vigo, Ponteareas, Redondela, Rianxo, Foz e A Coruña xa están as datas fixadas. 

Nas Feiras do Libro non só se venden libros. Podedes encontrarvos co voso autor ou autora favorito, asistir a recitais de poesía ou de música, ser testemuñas da presentación de novidades, acodir co voso exemplar para ser asinado polo autor ou autora, escoitar contos, presenciar representacións teatrais, participar en debates, xogos, obradoiros,  ... 

Non deixedes de visitar a vosa libraría de referencia, e participade da celebración da letra escrita, da tradición e da festa dos libros. 

APADRIÑAMENTOS

Estamos no camiño final deste curso tan diferente e desde a biblioteca queremos dar as grazas ao alumnado que participou nalgunha das propostas de colaboración da mesma.

Hoxe, queremos agradecer a labor das madriñas e dos padriños de 6º de E.P., que visitaron, contaron contos, recitaron poemas ou explicaron o manexo dos Escornabots ao alumnado de 5º de E.I. Incluímos unhas breves notas dalgúns deles, nas que explican como o vivenciaron:

Moitas grazas a todas e a todos! Queremos que o vindeiro curso os pequerrechos do noso cole volvan ter uns padriños / madriñas así de estupend@s. E que vós teñades toda a sorte do mundo no paso á Secundaria.
Saúdos agarimosos do Sr. Pippín

O pequeno morcego

Paula Carballeira é unha das nosas contadoras favoritas. Desde o Salón do Libro de Pontevedra chega este fermoso conto sobre os animais da noite, protagonizado por un pequeno morcego con gañas de saír da casa. 

Con vós na casa

Grazas á xenerosidade de un grupo de autores, Bahía edicións fai accesible baixo o título "Con vós na casa" unha selección de trece obras agrupadas por idades. Solicitando que se faga un uso respectuoso e responsable das mesmas, facilita a descarga en pdf e a súa utilización no tempo de lecer. Outro recurso que amosa a solidariedade por enriba doutros valores, e que debemos aproveitar.

Andersen conta... "El patito feo"

Candela e Tania abren o espazo de "Andersen conta" coa súa fermosa interpretación de "El patito feo". 

Papá

Hoxe non é un día máis. É o día dos papás. Os papás tamén están nos contos. Estes son dous bós exemplos.

O "Coronaconto"

Este mes debería estar a celebrarse o "Salón do Libro" de Pontevedra. É unha mágoa, porque estes eventos facilitan o acceso directo ás empresas editoriais, o encontro persoal, o intercambio. Por fortuna, as redes sociais van mermar o impacto que o coronavirus terá no intercambio de experiencias, e o Salón facilitará o acceso aos materiais en liña. Mediante as RR.SS., de 12.00 a 12.30 e de 17.30 a 18.00 publicarán recursos e novidades. Este que partillamos agora é un conto moi oportuno para abrir rego neste etapa de confinamento.

LECTURAS POLA IGUALDADE

O 25 de novembro conmemoramos o "Día Internacional para a eliminación da violencia contra as mulleres". Hai cincuenta e oito anos, na República Dominicana, asesinaron ás irmás Mirabal (Patria, Minerva e María Teresa), por defender os seus dereitos. Desde 1981, e por decisión da ONU, este día dedicámolo a lembrar ás mulleres que sofren violencia polo feito de selo, buscando a igualdade e tentando eliminar prexuízos.

Desde a escola queremos contribuir a crear un espazo máis igual para todos e todas, nos que o noso sexo non sirva como disculpa para poñernos límites. Ofrecemos unha guía de lectura con diversidade de títulos e soportes para que poidamos poñer en palabras o que vivimos cada día. Somos diferentes, pero iguais en dereitos e obrigas. Respectémonos. 

Mochilas viaxeiras

Xa están en circulación as mochilas viaxeiras de Primaria. Todas elas conteñen unha selección de lecturas para compartir en familia. Inclúen, ademais de libros, revistas e películas, un caderno no que cada familia pode reflectir a súa opinión sobre a actividade, o que máis lle gustou ou o que querería mellorar. Desta viaxe todos aprendemos, e o máis importante, disfrutamos compartindo o pracer de ler. 

Feliz aventura!

Actividade na Biblioteca Pública "Ánxel Fole"

Lembrade que o vindeiro venres, día 14 de outubro, ás 18.30, poderemos disfrutar dun contacontos na biblioteca de San Pedro de Nós. O Mago Paco presenta "Divermaxia. A Illa d@s Nen@s". Recomendada para a rapazada desde os 5 aos 10 anos, e para todos os que queiran pasar un bocadiño agradable escoitando contos mentres disfrutan da maxia. Se queres saber de máis actividades das bibliotecas municipais, preme aquí.